నా శాపం వల్లే వైఎస్సార్ మరణం: మీడియాకు, సీఎంలకు కేఏ పాల్ తీవ్ర హెచ్చరిక

ప్రజాశాంతి పార్టీ అధ్యక్షుడు కేఏ పాల్ మరోసారి సంచలన వ్యాఖ్యలతో వార్తల్లో నిలిచారు. దివంగత ముఖ్యమంత్రి వైఎస్ రాజశేఖర్ రెడ్డి తన శాపం కారణంగానే హెలికాప్టర్ ప్రమాదంలో మరణించారని ఆయన సంచలన ప్రకటన చేశారు. తనపై తప్పుడు కథనాలు ప్రసారం చేసిన తెలుగు మీడియా యాజమాన్యాలు 30 రోజుల్లోగా క్షమాపణ చెప్పకపోతే వైఎస్సార్‌కు పట్టిన గతే పడుతుందని తీవ్రంగా హెచ్చరించారు.

ఈ సందర్భంగా వైఎస్సార్ ఘటనను గుర్తుచేస్తూ, "2009 ఆగస్టులో నా చారిటీ సంస్థలకు చెందిన 14 బ్యాంకు ఖాతాలను వైఎస్సార్ ప్రభుత్వం మూసివేసింది. సెప్టెంబర్ 1న నేను ఉపవాసం ఉండి కన్నీళ్లతో ప్రార్థన చేశాను. సెప్టెంబర్ 2న ఆయన హెలికాప్టర్ కూలిపోయింది. నా శాపం వల్లే ఆయన మరణించారు. కొంతమంది మీడియా వాళ్లే అప్పుడు 'పాల్ శాపం' అని బ్రేకింగ్ న్యూస్‌లు వేశారు" అని పాల్ వివరించారు.

అనంతరం మీడియాపై తీవ్ర స్థాయిలో విరుచుకుపడ్డారు. తనపై ఒక తప్పుడు కేసు విషయంలో కొన్ని తెలుగు ఛానెళ్లు (టీవీ9 మినహా) అత్యుత్సాహం ప్రదర్శించాయని, బ్రేకింగ్ న్యూస్‌ల పేరుతో దుష్ప్రచారం చేశాయని ఆరోపించారు. "నన్ను దెబ్బతీయాలని చూసిన మీడియా ఓనర్లు, సీఈఓలు, రిపోర్టర్లు 30 రోజుల్లో క్షమాపణ చెప్పాలి. లేదంటే దేవుడు వారి కుటుంబాల్లో ఎవరినో ఒకరిని అనారోగ్యంతోనో, యాక్సిడెంట్ రూపంలోనో, ఆర్థికంగానో తీవ్రంగా శపిస్తాడు" అని హెచ్చరించారు. వారిని సైతాను బిడ్డలని, దరిద్రులని తీవ్ర పదజాలంతో దూషించారు.

ఏపీ, తెలంగాణ ముఖ్యమంత్రులు చంద్రబాబు నాయుడు, రేవంత్ రెడ్డికి కూడా ఆయన హెచ్చరికలు జారీ చేశారు. "తెలంగాణను పాలిస్తోంది రేవంత్ రెడ్డా లేక చంద్రబాబా అని వేల మంది ప్రశ్నిస్తున్నారు. చంద్రబాబు చెప్పిందే రేవంత్ చేస్తున్నారు. మీ గుండెలు ఆగిపోకముందే, మీకు యాక్సిడెంట్లు అవ్వకముందే దేవుని భయంతో బతకండి. లేదంటే సర్వనాశనం తప్పదు" అని అన్నారు.

తనకు ప్రపంచవ్యాప్తంగా 200 కోట్ల మంది అభిమానులు ఉన్నారని, ప్రధాని మోదీ వంటి నేతలు తనను గౌరవిస్తారని పాల్ తెలిపారు. తనను చంపాలనుకున్న వారు కుక్కచావు చస్తున్నారని, తన దేవుడి శక్తి ముందు ఎవరూ నిలబడలేరని వ్యాఖ్యానించారు.